المركز التكنولوجي المتنقل خدمة جليلة.. ولكن!
كلما جلست في جلسة مع ولاد بلدنا في منيل موسي أو قمبش أو حتي هليه والفنت والميمون وبهبشين وننا ألاقي سؤال دائر.. سمعنا عن تواجد سيارة بيقولوا انها بتقدمات خدمات للمواطنين وعلي ما لبسنا الهدوم وروحنا نشوف العربية فين وبتعمل أيه ما لقيناش حاجة وقالوا لنا دي كانت موجود من الصبح انتم جايين تسألوا آخر اليوم.. قلناهم هو احنا حد عرفنا غير اليوم..
حبايبي ولاد بلدي عايز أقول لكم: سيارة الخدمات التكنولوجية أو ممكن نقول عليها المركز التكنولوجي المتنقل هي عبارة عن سيارة تقوم علي توفير عدد كبير من الخدمات الحكومية لأهالي المكان اللي بتروح فيه.. يعني الحكومة عايزة توصل لك الخدمة لحد البيت علشان ما تتعبكش..
وهنا كان الرد: يعني الحكومة اشترت سيارة بالملايين وجابت موظفين وعلمتهم الشغل اللي هيقدموه وحددوا الموعد وأكيد كان في استقبالهم أكبر الموظفين في المكان ونسوا خالص يعرفونا إن السيارة دي هتيجي امتي وما نعرفش غير في آخر اليوم اللي السيارة جات فيه.. وبكدة بقي محدش هيروح كتير وكدة السيارة مش هتيجي تاني علشان هيقولوا رحنا ومفيش حد جه أساسا يبقي نروح ليه..
هنا اتوقف مليا واعجز عن الرد غير أني اقول له بملء الفم "عندك حق والله يا اخي" احنا والجماعة اللي قايمين علي الأمر اخطأنا في حق المواطن لا احنا كجمعيات أهلية أو اعلام عرفنا الناس ولا الموظفين المعنيين كانوا حريصين علي توصيل المعلومة.. دا حتي بيان المحافظة بيصل للصحافة والاعلام بعد السيارة ما بتكون قربت تخلص شغل وتقفل وتمشي..
ولما هممت بجمع أوراقي والاستئذان بالانصراف بعد أن تبين تقصيري مع ولاد بلدي مسكني احدهم وقالي رايح فين.. وقالي: " طيب يا أخي اعمل حاجة حلوة في حياتك وعرفني هي ايه الخدمات اللي بتقدمها السيارة دي"..
عدت للجلوس وبدأت اخد وضعي تاني كصحفي واعلامي يملك من المعلومات ما لا يملكه كثيرون غيري،، وقلت: يا حبايبي السيارة دي تقدم حزمة من الخدمات الحكومية أهمها:
. تراخيص البناء والمنشآت: تشمل طلبات تراخيص البناء، وتجديدها، وإصدار بيان صلاحية الموقع، وطلبات الهدم الكلي أو الجزئي.
. تراخيص المحال التجارية: إصدار وتجديد رخص المحال العامة والأنشطة التجارية والصناعية.
. الإعلانات والشواغل: استخراج تراخيص تركيب الإعلانات التجارية وإشغالات الطرق.
. خدمات التصالح: تلقي طلبات ومتابعة إجراءات التصالح في مخالفات البناء.
.المرافق والخدمات: طلبات توصيل المرافق الدائمة والمؤقتة (كهرباء، مياه، غاز).
. الاستعلام والدفع: الاستعلام عن المستندات المطلوبة، وموقف الرخص.
وانهيت كلامي بالقول: شفتم بقي يا حبايبي السيارة دي مفيدة ازاي وأوعدكم المرة اللي جاية اعرفكم بالموعد قبل مجيئها بيوم واحد علي الاقل.. بس المهم أكون عارف..
