رمضان ابو إسماعيل يكتب: علي كل لون يا فيسبوك

بعد علاقة امتدت سنوات طويلة مع عالم التواصل الاجتماعي وبالأخص الفيسبوك وجدت تنوعا كبيرا في صفحات الأصدقاء فمنهم الواعظ، ومنهم الجاد والفليسوف والمتحذلق والثائر، والمعارض.

ويمكن تقسيم أصدقاء الفيسبوك إلي أنواع عدة، وأهمها: 

1- الصديق الجاد: تلاقي صفحته عاملة كدة زي المجلات العلمية، وده تلاقي كلامه دوما فيه غلة، وجدية كلام الصفحة بيقلل الإقبال عليها خصوصا أن أكثر الناس بتحب المحتوي الخفيف (ثقافة التيك أواي).

2- الصديق الواعظ القديس: كلامه تلاقية وعظ وإرشاد وساعات كمان وعيد.. وده ما يضرش غير أنه حتي تطالع ما بالصفحة بنفس راضية ضروري يكون صاحب الصفحة مجهول علشان لا تقارن ما يكتبه بما يفعله.

3- الصديق اللوام المعاتب: ده تلاقي كل كلامه لوم وعتاب وساعات وعيد كمان، وده في الغالب بيكون مصدر للإزعاج والقلق لأن كلامه دوما بيكون موجه لاصدقاءه (مقصودة).. تلاقيه مثل عذاب الضمير غير أنه يعاتب علي الصغيرة والكبيرة وبيعاتب البعيد قبل القريب..

4- الصديق المتحذلق: دي بقي صفحات متلقيش عليها غير الكلام العايم من عينة (توقعات بانخفاض درجات الحرارة في شهر يناير المقبل).. وفي يناير يجيب سكرين شوت من البوست اللي فات ويقول (صدقت توقعاتنا وانخفضت درجات الحرارة).. وتلاقيه كاتب (انتخابات الشيوخ تسبق انتخابات النواب..) علشان يطلع بعد كدة يقولك سبقنا الجميع وصدقت توقعاتنا.. مع إن المعلوم للكافة أن انتخابات الشيوخ تسبق النواب.. وأصحاب هذه الصفحات دوما تجده حد كدة يجتهد ليعكس للناس قد أيه هو واثق من نفسه علما أن الحقيقة في الغالب بتكون عكس ذلك تماما.

5- الصديق الثائر المعارض: ده بقي تلاقيه مفيش حاجة في الدنيا عجباه كل بوستاته حديث عن فشل الآخرين وسوءاتهم سواء كانوا مسئولين أو حتي أصحاب المهنة أو الجوار وخلافه.. وده بقي زي النوع الأول(الواعظ) من الأفضل إنك تكون تعرفه كصديق علي الفيسبوك بس، يعني أخلاقه وتصرفاته علي الأرض مجهولة بالنسبة لك، لأن أكثر هؤلاء تجدهم في الحقيقة مجرد تجار ثورة.. يعني تلاقي أغلبهم يصدق عليهم (يقولون ما لا يفعلون) .. والنوع الأكثر استفزازا من هذا الصنف الاصدقاء اللي مش فاهمين إن كل اللي حواليهم عارفين إنهم مجرد تجار شعارات وأنهم أبعد ما يكونوا عن الثورة علي الخطأ والدعوة إلي المثالية.. وهذه النوعية ممكن تلاقي البعض بيحافظ علي صداقتهم فقط (خوفا من شر لسانه).

6- الصديق المعارض: ده بقي صديق علي الفيسبوك بحث عنك حتي يحصل علي كل فرصة لإعلان معارضته علي كل كلمة تكتبها علي صفحتك لدرجة انك لما بتكتب دوما بتلاقي نفسك بتكون متوقع هو هيعلق علي كلامك بأيه.. الصديق ده بقي دوما تجده رافع شعار (خلقت لأعترض).

طبعا كل ما سبق من أشكال واصناف علي سبيل المثال لا الحصر بمعني إنك ممكن تلاقي صديق خارج كل هذه التصنيفات وده بقي يبقي من بختك.