الحد الأدنى للاجور.. وسنينه!

التأمينات الاجتماعية هي الجهة الأكثر استفادة مت قرارات رقع الحد الأدنى للاجور 

رفع الحد الأدنى للاجور أمر محمود حال ما اذا تم تطبيقه في سوق العمل

العمال اللي بيقع عليهم ضرر من رفع الحد الأدنى للاجور أكبر ممن يستفيدون

قرار المجلس القومي للأحور القاضي برفع الحد الأدنى للأحور ليكون 7000 جنيه بدلا عن 6000 جنيه، وذلك للعاملين بالقطاع الخاص ( أكثر من 80% من الأيدي العاملة)، قبل أيام.

 وبالتأكيد، أمر محمود أن يتم  رفع الحد الأدنى للاجور من 6000 إلي 7000 جنيه  مراعاة لارتفاع تكلفة المعيشة، لكن غير المحمود في الأمر أن ما حدث لن يحرك ساكنا في سوق العمل، يعني بالبلدي كدة محدش بيطبق حد أدني غير الجهات اللي بتحصل فلوس من المواطنين ومنها علي سبيل المثال لا الحصر التأمينات الاجتماعية.

تخيلوا يا سادة إن العمال اللي بيقع عليهم ضرر من رفع الحد الأدنى للاجور ممكن يكون أكبر ممن يستفيدون من هذا القرار.. نعم هناك من يتأثرون سلبا لأن دخولهم الحقيقية تتراجع بسبب زيادة الخصومات وربما ارتفاع الأسعار في الأسواق.

وهنا السؤال الذي يطرح نفسه: هل يلتزم أصحاب الأعمال بقرارات الحد الأدنى للأجور؟ 

قطعا لا يلتزم أكثر أصحاب الأعمال بهذا الحد المعلن من قبل الحكومة، التي لا تلتزم اساسا بعض جهاتها به مع العاملين بنظام السركي اليومي أو العاملين في الوحدات المملوكة ملكية خاصة للدولة.

قطعا، لا تلتزم شركات توريد العمالة في مجالات النظافة والأمن والحراسة والخدمات بهذا الحد الأدنى، فلا يوجد شركة من الشركات التي تقوم علي التوظيف في هذه القطاعات وهي كثيرة بالالتزام بدفع 28 جنيه للعامل مقابل كل ساعة عمل.

وعلشان ما تأخدناش الشهامة ممكن نبص حوالينا ونشوف فلو حضرتك محامي او طبيب أو محاسب أو صاحب عمل اي كان وعندك ساعي أو عامل خدمات أو سائق أو مندوب أو خلافه هتدفع له 7000 لحلوح شهريا.. لو حضرتك هتدفع يبقي الحد الأدنى للاجور هينفذ ومش هيكون حبر علي ورق.

يا سادة المثل الشعبي بيقول لو كان المتكلم مجنون ضروري يكون المستمع عاقل.. دا اللي بيحصل دلوقتي أنه فيه جهات عديدة بتاخد علي اللي يشتغل عندها إيصالات أمانة أو توقيع علي استمارة 6 قبل استلام العمل.. علشان اللي يحب يتمرد يبقي مصيره الشارع. 

نصيحتي لاخويا وابن عمي وجاري الغلبان اوعي تصدق الكلام اللي بيتقال علي شاشات التليفزيون وتروح تشتكي صاحب العمل في مكتب العمل علشان تاخد الحد الأدنى للأجور علشان صدقني والله لو رحت اشتكيت مش هتاخد الحد الأدنى للأجور.. ويؤسفني اني اقول لك انك في هذه الحالة هتاخد "صابونة".